”حافظ صاحب! یہ معراج کی رات کیا ہوا تھا؟“

یہ جملہ سن کر مجھے حیرت کا جھٹکا لگا، میں نے چونک کر اُس کی طرف دیکھا۔
شام کا سورج غروب ہونے کو تھا۔ سورج کی سرخی اُفق کے کناروں پر پھیل رہی تھی، میں آج معمول سے پہلے ہی دفتر سے نکل آیا تھا۔ بازار سے گزرتے ہوئے چمن سویٹ پر نظر پڑی تو یاد آیا کہ ہمشیرہ نے سموسوں کی فرمائش کی تھی، چمن سویٹ پر آج معمول سے زیادہ رش تھا، شاید اس کی وجہ شب معراج تھی۔
خریدنے والوں کی باقاعدہ قطار لگی ہوئی تھی۔ میں بھی قطار میں لگ گیا کہ اچانک مجھے یہ آواز سنائی دی، وہ فیکا حلوائی تھا جو چمن سویٹ پر برسوں سے ملازم تھا، بچپن اس کے ہاتھ کے پکوڑے، سموسے اور کچوریاں کھاتے ہوئے گزرا۔
”چچا! اس وقت تو ذرا جلدی میں ہوں، نماز کا وقت ہوا چاہتا ہے، آپ بھی مصروف ہیں، صبح دفتر جاتے ہوئے آپ کے پاس آؤں گا، پھر تفصیل سے عرض کروں گا۔“ میں نے کہا۔
”او جیوندا رے پتر! میں انتظار کروں گا۔او سلیم! حافظ پتر کو ذرا تازہ اور خستہ سموسے دینا، میری طرف سے ایک میٹھی چٹنی بھی اضافی دینا۔“ چچا فیکا نے آواز لگائی، میں مسکرا کر رہ گیا۔
صبح میں وعدے کے مطابق اُن کے پاس پہنچ گیا۔ چچا بالکل ان پڑھ تھے۔ اللہ کا خوف اور اس کے رسولﷺ سے عشق رکھتے تھے۔ بس یہی اُن کا کل ایمان تھا۔پانچ وقت کے نمازی تھے۔ میں نے اپنے تئیں کوشش کی کہ انھیں آسان سے آسان انداز میں واقعہ معراج کی تفصیلات بتاسکوں۔ حضورﷺ کے اس عظیم الشان سفر کی روداد سن کر چچا کی آنکھیں بار بار بھیگ جاتیں، سنتے ہوئے اُن کے لبوں پردرود شریف ﷺ کا ورد جاری تھا۔ انھیں سفرِ معراج کے بارے میں بتا کر میرا بھی ایمان تازہ ہوگیا۔چچا فیکا سے ہی مجھے خیال آیا کہ واقعہ معراج کو انتہائی آسان اور عام فہم انداز میں لکھنا چاہیے، کہ جو تھوڑی بہت بھی اُردو پڑھنا جانتا ہو وہ آسانی سے پڑھ سکے اور جو پڑھ نہیں سکتا اُسے کوئی بچہ بھی پڑھ کے سنا دے تو وہ بآسانی سمجھ لے۔ یوں وہ خیال اس کتاب کی صورت منظرِ عام پہ آیا، اور اب اس کا تیسرا ایڈیشن آپ کے ہاتھوں میں ہے۔ الحمدللہ اس کتا ب کو اللہ تعالیٰ نے بڑی مقبولیت عطافرمائی۔ میں نے بازار کے بہت سے پھل فروشوں، ٹھیلے والوں، مزدوروں کو پیش کی، اُنھوں نے بآسانی پڑھ اور سمجھ لی۔ بہت سے قارئین نے اپنے گھر کے بزرگوں کو سنائی۔ الحمدللہ سبھی کوآسان انداز میں لکھی گئی اس کتاب سے واقعہ معراج کو جاننے اور سمجھنے میں آسانی ہوئی۔
قارئین کرام! یہ کوئی علمی یا تحقیقی کتاب ہرگز نہیں، اس میں دقیق و باریک ابحاث بھی شامل نہیں، آپ اسے اختلافات و دلائل سے بھی خالی پائیں گے۔ یہ تو ایک دیہاتی اور کم پڑھے لکھے مصنف کی طرف سے اپنے جیسے دیہاتیوں اور واجبی سی تعلیم والے عام مسلمان کے لیے لکھی گئی ایک عام سی کتاب ہے کہ ایک عام پڑھا لکھا آدمی اگر جانناچاہے کہ شبِ معراج کو کیا کیا واقعات پیش آئے تھے تو اُسے یہ کتاب پیش کی جاسکتی ہے۔
رسول اللہﷺ کی سیرتِ مبارکہ کے کسی بھی گوشے پر قلم اٹھانے کی توفیق مل جانا بلاشبہ ایک بڑی سعادت ہے کہ

ایں سعادت بزور بازو نیست
تانہ بخشد خدائے بخشندہ

ترجمہ: ”یہ وہ سعادت ہے جو آدمی اپنے زورِ بازو سے حاصل نہیں کر سکتا کہ جب تک بخشنے والا خدا یہ سعادت نہ بخشے۔“

دعا ہے کہ جس خدائے ذو الجلال کی توفیق سے یہ سعات ملی وہ اپنے ہاں اسے قبول فرمائے اور میرے لیے باعث شفاعت بنائے۔آمین!
محمد فہیم عالم
۱۱۔اکتوبر۲۰۲۳ء

-21%